• विराटनगर विमानस्थलमा उपप्रधानमन्त्री प्रकाशमान सिंह

१६ पुस, बिराटनगर । मन्त्री बनेपछि आफ्ना प्रत्येक भाषणमा स्थानीय निर्वाचनको तयारी भइरहेको बताउने उपप्रधानमन्त्री एवं स्थानीय विकासमन्त्री प्रकाशमान सिंहले संविधान बनेपछि स्थानीय चुनाव हुने बताएका छन् ।

वीपी मेलमिलाप दिवसका अवसरमा पार्टीद्वारा आयोजित कार्यक्रममा सहभागी हुन बिराटनगर आएका मन्त्री सिंहले विमानस्थलमा पत्रकारहरूसँग कुरा गर्दै संविधान बनेपछि राजनीतिक सहमतिका आधारमा चुनाव हुने बताएका छन् ।

पार्टीको कार्यक्रममा भाग लिन सरकारी स्रोत खर्च गरेर बिराटनगर पुगेका सिंहले सहमति नभए प्रक्रियामा गएर भए पनि माघ ८ भित्रै संविधान जारी हुने बताए ।

सहमतिका लागि शीर्ष नेताहरुले छलफल गरिरहेको उनले बताए । ‘दलका शीर्ष नेताहरुवीच छलफल चलिरहेको छ, सिंहले भने, ‘यदि सहमति भएर समय लम्बिए पनि विधि र प्रकृयावाटै संविधान जारी हुनेछ ।’

संविधान निर्माणपछि राष्ट्रपति, प्रधानमन्त्री लगायतको पावर सेयरिङका विषयमा पनि संविधानसभाले टुंगो लगाउने मन्त्री सिंहले बताए ।

मन्त्री सिंहले राजनीतिक अस्थिरताका कारण मुलुक आर्थिक गतिमा अग्रसर वन्न नसकेको उल्लेख गर्दै अब कुनै पनि हालतमा संविधान जारी हुनुपर्नेमा जोड दिए ।