Loading...

नवलपरासी, १५ फाल्गुन । छोराको हत्या गरेपछि आत्महत्याको प्रयास गरेकी नवलपरासी तमसरिया–२ बसन्तपुरकी एक महिलालाई गाउँलेले उद्धार गरेर बचाएका छन् ।

शुक्रबार बिहान आफ्ना ९ वर्षीय छोरा प्रजितलाई घाँटी थिचेर मारेपछि तनावमा रहेकी ३० वर्षीय जमुना जीसी पंखामा झुन्डिन लागेको अवस्थामा देखेपछि छिमेकीले उद्धार गरेका हुन् । ठूली छोरी र छोरासँग बस्दै आएकी जमुनाले छोराको हत्या गरेपछि शवलाई खाटमुनि राखेर आफूले आत्महत्याको प्रयास गरेको छिमेकीले बताएका छन् ।

छोरी ट्युसन पढ्न गएको मौका पारी उनले छोराको हत्या गरेकी बताइएको छ । पंखामा सल बाँधेर पासो लगाएको अवस्थामा खाँटमा छट्पटाइरहेकी जमुनालाई गाउँलेले देखेपछि उद्धार गरेका हुन् ।

‘छोरा मर्‍यो’ भन्दै अर्धचेतमा बर्बराइरहेकी जमुना बेहोस भएपछि उनलाई उपचारका लागि कावासोतीस्थित मध्यविन्दू सामुदायिक अस्पतालमा पठाइएको प्रहरीले जनाएको छ । भारतीय सेनामा कार्यरत उनका श्रीमान् जागिरको क्रममा उतै छन् ।

बुधवार राति श्रीमानसँग फोनमा झगडा भएको र त्यसैको तनाबमा उनले उक्त घटना घटाएको हुनसक्ने छिमेकीको अनुमान छ ।

Loading...