Loading...

हिन्दू राष्ट्रको नाममा जनतालाई धोका दिएको, व्यापार गरेको र देशव्यापी चन्दा उठाएर भ्रष्टाचार गरेको आरोप लगाउँदै राप्रपा नेपालको असन्तुष्ट समुहले अध्यक्ष कमल थापाको शनिबार यहाँ पुत्ला दहन गरेको छ ।



निर्धारित कार्यक्रम अनुसार राप्रपा नेपालको रथायात्रा नेपालगंज पुग्ने एक दिन अगाडि राप्रपा नेपाल पार्टीभित्र सुदढीकरण अभियान चलाउँदै आएको असन्तुष्ट समुहले थापाको पुत्ला जलाएको हो । बाँके जिल्ला कार्यसमितिको नेतृत्वमा त्रिभुवन चोकमा पुत्ला जलाइँदै गर्दा कार्यकर्ताले ‘हिन्दू राष्ट्र जिन्दावाद ! भ्रष्ट कमल थापा मुर्दावाद ! ’ भन्दै नारावाजी गरेका थिए ।





फोटो सौजन्यः सगुन लावतीको फेसबुक



पुत्ला जलाउनुपूर्व सम्पन्न आमसभामा केन्द्रीय तथा जिल्ला तहको नेतृत्वपंक्तिले थापाले बाटो बिराएको र राप्रपा नेपालको मूलभूत सिद्धान्तमा संझौता गरेकोमा चिन्ता व्यक्त गरेका थिए ।



भगवान कृष्ण र अर्जुनभन्दा ठूलो फोटो राखेर आफ्नो प्रचार गर्दै भगवान र धर्मको थापाले अपमान गरेको समेत सुदढीकरण अभियान पक्षधरहरुले आरोप लगाएका थिए ।



सो अवसरमा चौबीस सभासद चयन गर्दा व्यापार गरेजस्तै हिन्दू राष्ट्रको नाम बेचेर फेरी पनि कमल थापाले भ्रष्टाचार गरेको भन्दै नेता प्रल्हाद साहले आपत्ति जनाएका थिए । थापा आत्मसमर्पणको गलत मार्गचित्रमा हिडेकोले उनलाई पदमुक्त गर्दै राप्रपा नेपालको अभियानलाई नयाँ सिराबाट अघि लैजाने, अभियानका सहसचिव रामु राईले बताए ।



यस्तै संविधान लेखन प्रक्रिया महत्वपूर्ण चरणमा प्रवेश गरेको बेला संविधानसभा छलेर बाटोबाटो हिन्दू राष्ट्र पूनःस्थापन गर्छु भन्नु हास्यास्पद भएको, नेता सगुनसुन्दर लावतीले आमसभामा बोल्दै बताए ।



कार्यक्रम अभियानका जिल्ला संयोजक दीपेन्द्र सिंहको अध्यक्षतामा सम्पन्न भएको थियो ।

Loading...