११ पुस, हेटौडा । राष्ट्रिय प्रजातन्त्र पार्टी नेपालले हिन्दू राष्ट्र कायम गर्न माग गर्दै सुरु गरेको मेची-महाकाली संकल्प रथयात्राको तेस्रो दिन शुक्रबार सर्लाहीको हरिवनबाट सुरु भएको छ ।

आज रथयात्रासहित विभिन्न सात स्थानमा सभा गर्ने राप्रपा नेपालका सहप्रवक्ता मोहन श्रेष्ठले जानकारी दिए । आज हरिवनसहित, बागमती, चन्द्रनिगाहपुर, निजगढ, पथलैया, अमलेखगञ्ज तथा दिउँसो हेटौंडामा सभा हुनेछ ।

राप्रपा नेपालका अध्यक्ष कमल थापाले नेतृत्व गरेको रथयात्रामा उल्लेख्य रुपमा स्थानीय नेता तथा कार्यकर्ता सहभागी रहेको श्रेष्ठले बताए ।

विभिन्न ३० जिल्लाको यात्रा पूरा गरी आगमी पुस १८ गते काठमाडौंमा रथयात्रा समापन गर्ने राप्रपा नेपालको कार्यक्रम रहेको छ । ‘मेची महाकाली-श्री पशुपतिनाथ हिन्दूराष्ट्र पुनःस्थापना संकल्प रथयात्रा नाम दिइएको यात्रा १० दिनसम्म सञ्चालन हुनेछ ।